واضح رہے کہ اس سورۂ کریمہ کا بڑا حصہ غزوۂ تبوک کے موقع پر نازل ہوا، جب نبی ﷺ نے مسلمانوں کو رومیوں سے جنگ کے لیے نکلنے کی ترغیب دی۔ اُس وقت موسم گرم تھا، توشہ کم تھا اور معیشت تنگ تھی۔ اس پر بعض مسلمانوں میں سستی پیدا ہوئی جس پر اللہ تعالیٰ نے انھیں ملامت کی اور ابھارا۔ چنانچہ فرمایا: {اے ایمان والو!} کیا تم ایمان کے تقاضے پر عمل نہیں کرتے، اور یقین کی پکار پر لبیک کہتے ہوئے اللہ کے حکم کی طرف دوڑنے، اس کی رضا کی طرف لپکنے، اس کے دشمنوں سے جہاد کرنے اور اپنے دین کی مدد کرنے میں تیز نہیں ہوتے؟ {تمھیں کیا ہو گیا ہے کہ جب تم سے کہا جاتا ہے کہ اللہ کی راہ میں نکلو تو تم زمین پر گر جاتے ہو} یعنی سستی کرتے ہو اور زمین، آرام اور سکون کی طرف مائل ہو جاتے ہو۔ {کیا تم آخرت کے بدلے دنیا کی زندگی پر راضی ہو گئے ہو؟} یعنی تمھاری حالت تو بس اُس شخص جیسی ہے جو دنیا پر راضی ہو کر اسی کے لیے دوڑ رہا ہو اور آخرت کی پروا نہ کرتا ہو، گویا وہ آخرت پر ایمان ہی نہیں رکھتا۔ {تو دنیاوی زندگی کا سازو سامان آخرت کے مقابلے میں کچھ بھی نہیں مگر تھوڑا سا ہے} جس کی طرف تم مائل ہوئے اور اسے آخرت پر مقدم کر بیٹھے۔ کیا اللہ نے تمھیں ایسی عقلیں نہیں دیں جن سے تم امور کو پرکھو اور دیکھو کہ کون سی چیز زیادہ حق دار ہے کہ اسے ترجیح دی جائے؟ کیا دنیا، اپنے آغاز سے انجام تک، آخرت کے مقابلے میں کوئی نسبت رکھتی ہے؟ انسان کی عمر دنیا میں کتنی مختصر ہے کہ اسے آخری مقصد بنا لیا جائے، یہاں تک کہ اس کی کوشش، اس کی محنت، اس کی فکر اور اس کا ارادہ اس مختصر دنیاوی زندگی سے آگے نہ بڑھے، جو رنج و غم سے بھری اور خطرات سے لبریز ہے۔ پس تم کس رائے کی بنا پر اسے اُس آخرت والے گھر پر ترجیح دیتے ہو جو ہر نعمت کو جمع کرنے والا ہے، جس میں وہ سب کچھ ہے جو نفس چاہیں اور آنکھیں لذت پائیں، اور تم اس میں ہمیشہ رہنے والے ہو؟ اللہ کی قسم! جس کے دل میں ایمان جما ہوا ہو، جس کی رائے پختہ ہو اور جو عقل والوں میں شمار ہوتا ہو، وہ دنیا کو آخرت پر ترجیح نہیں دیتا۔ پھر اللہ تعالیٰ نے جہاد کے لیے نہ نکلنے پر وعید سنائی: {اگر تم نہ نکلو گے تو وہ تمھیں دردناک عذاب دے گا} دنیا اور آخرت دونوں میں۔ کیونکہ جب نکلنے کا حکم دیا جائے تو نہ نکلنا بڑے گناہوں میں سے ہے جو سخت ترین سزا کا باعث ہے، کیونکہ اس میں سخت نقصانات ہیں۔ پیچھے رہ جانے والے نے اللہ کی نافرمانی کی اور اس کی ممانعت کا ارتکاب کیا، اللہ کے دین کی مدد میں ساتھ نہ دیا، اللہ کی کتاب اور اس کی شریعت کا دفاع نہ کیا، اور اپنے مسلمان بھائیوں کی اُس دشمن کے مقابلے میں مدد نہ کی جو انھیں جڑ سے ختم کرنا اور ان کے دین کو مٹانا چاہتا ہے۔ بسا اوقات ایسے شخص کی پیروی دوسرے کمزور ایمان والے بھی کرنے لگتے ہیں، بلکہ بعض اوقات وہ اللہ کے دشمنوں سے جہاد کرنے والوں کے بازو کمزور کر دیتا ہے۔ ایسے شخص کے لیے یہی مناسب ہے کہ اللہ اسے سخت وعید سنائے، چنانچہ فرمایا: {اگر تم نہ نکلو گے تو وہ تمھیں دردناک عذاب دے گا اور تمھاری جگہ کوئی دوسری قوم لے آئے گا} جو پھر تمھارے جیسی نہ ہوگی، {اور تم اس کا کچھ نہ بگاڑ سکو گے۔} کیونکہ وہ اپنے دین کی مدد اور اپنے کلمے کی سربلندی کا خود ذمہ دار ہے، پس تمھارا اللہ کے حکم کو بجا لانا اور تمھارا اسے پیچھے پھینک دینا اس کے نزدیک برابر ہے۔ {اور اللہ ہر چیز پر قادر ہے} کوئی چیز جسے وہ چاہے اُس کو عاجز نہیں کر سکتی، اور نہ کوئی اس پر غالب آ سکتا ہے۔