اللہ تعالیٰ اس بات کی خبر دیتا ہے کہ دنیا کی حقیقت کیا ہے اور وہ کس حال میں ہے، اور اس کی انتہا اور اہلِ دنیا کا انجام بیان کرتا ہے کہ دنیا کھیل اور تماشا ہے؛ جسموں سے اس کا کھیل کھیلا جاتا ہے اور دلوں سے اس میں دل بہلایا جاتا ہے۔ اس کی تصدیق دنیا والوں کے موجودہ اور واقعی حال سے ہوتی ہے، کیونکہ تم دیکھتے ہو کہ وہ اپنی عمریں دل کے بہلاوے اور اللہ کے ذکر سے غفلت میں گزار دیتے ہیں، اور اپنے سامنے کے وعدے اور وعید سے بے خبر رہتے ہیں، بلکہ بعض لوگ اپنے دین کو بھی کھیل اور تماشا بنا لیتے ہیں۔ اس کے برعکس بیدار دل لوگ اور آخرت کے کام کرنے والے ہیں، ان کے دل اللہ کے ذکر، اس کی معرفت اور اس کی محبت سے آباد ہوتے ہیں، اور انہوں نے اپنے اوقات ان اعمال میں لگا رکھے ہیں جو انہیں اللہ کے قریب کریں، خواہ وہ نفع اپنی ذات تک محدود ہو یا دوسروں تک پہنچنے والا ہو۔ [اللہ کا فرمان:] ﴿وَزِينَةٌ﴾ یعنی لباس، کھانے، پینے، سواریوں، گھروں، محلوں اور جاہ و حشمت میں بناؤ سنگھار، [اور اس کے علاوہ دیگر چیزیں]۔ ﴿وَتَفَاخُرٌ بَيْنَكُمْ﴾ یعنی اہلِ دنیا میں سے ہر شخص دوسرے پر فخر جتانا چاہتا ہے اور چاہتا ہے کہ اس کے معاملات میں وہی غالب ہو اور اسی کی شہرت ہو۔ ﴿وَتَكَاثُرٌ فِي الْأَمْوَالِ وَالْأَوْلَادِ﴾ یعنی ہر شخص چاہتا ہے کہ مال اور اولاد میں وہ دوسروں سے بڑھ جائے۔ اس کی تصدیق ان لوگوں کے عمل سے ہوتی ہے جو دنیا کے شیدائی ہیں اور اسی پر مطمئن ہیں۔ اس کے برعکس وہ شخص ہے جس نے دنیا اور اس کی حقیقت کو پہچان لیا، اس نے دنیا کو گزرگاہ بنایا، ٹھکانہ نہیں بنایا؛ چنانچہ وہ ان چیزوں میں رغبت اور مقابلہ کرتا ہے جو اسے اللہ کے قریب کریں، اور ان ذرائع کو اختیار کرتا ہے جو اسے اللہ تک پہنچائیں۔ اور جب وہ کسی کو مال اور اولاد میں اپنے سے آگے بڑھتا دیکھتا ہے تو نیک اعمال میں اس سے مقابلہ کرتا ہے۔ پھر اللہ تعالیٰ نے دنیا کی مثال ایسی بارش سے دی جو زمین پر برسی، پھر اس سے زمین کی نباتات خوب گھنی ہو گئیں، جن میں سے انسان اور جانور کھاتے ہیں، یہاں تک کہ جب زمین اپنی رونق پر آ گئی اور اس کی سبزی کفار کو بھلی لگنے لگی، جن کی ہمت اور نظر صرف دنیا تک محدود تھی، تو اللہ کے حکم سے اس پر ایسی آفت آئی [جس نے اسے تباہ کر دیا] کہ وہ سوکھ کر بے رونق ہو گئی، اور گویا وہاں کبھی کوئی سبزہ اگا ہی نہ تھا اور نہ اس کا کوئی خوش نما منظر دیکھا گیا تھا۔ دنیا کا حال بھی ایسا ہی ہے، جب وہ اپنے طلب گار کے لیے خوش نما اور شاداب ہوتی ہے، تو جو کچھ وہ چاہتا ہے حاصل ہو جاتا ہے، اور جس طرف بھی وہ اس کے کاموں میں متوجہ ہوتا ہے، اس کے دروازے کھلے پاتا ہے؛ پھر جب تقدیر اسے پہنچتی ہے اور وہ اسے اس کے ہاتھ سے نکال دیتی ہے، اور اس پر اس کا تسلط ختم کر دیتی ہے، یا اسے اس سے جدا کر دیتی ہے، تو وہ خالی ہاتھ دنیا سے رخصت ہوتا ہے، اور کفن کے سوا کچھ زادِ راہ نہیں لے جاتا۔ پس ہلاکت ہو اس شخص کے لیے جس کی آرزو اور عمل کی انتہا یہی دنیا ہو۔ رہا آخرت کا عمل، تو وہی نفع دیتا ہے، صاحبِ عمل کے لیے ذخیرہ بنتا ہے، اور بندے کے ساتھ ابد تک رہتا ہے۔ اسی لیے اللہ تعالیٰ نے فرمایا: ﴿وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ﴾ یعنی آخرت کا حال ان دو باتوں سے خالی نہیں: یا تو جو شخص دنیا ہی کو اپنا مقصد اور مطلوب بنائے، پھر اللہ کی نافرمانیوں پر دلیر ہو، اللہ کی آیات کو جھٹلائے اور اللہ کی نعمتوں کا انکار کرے، اس کے لیے جہنم کی سخت آگ، اس کی زنجیریں، طوق اور ہولناکیاں ہیں۔ اور یا پھر اللہ کی طرف سے گناہوں کی بخشش، سزاؤں کا ہٹ جانا اور اللہ کی رضا ہے، جو اس کو دارالرضوان میں اتارے گی، اُس شخص کے لیے جو دنیا کی حقیقت کو پہچانے اور آخرت کے لیے اپنی سی کوشش کرے۔ یہ سب باتیں دنیا سے بے رغبتی اور آخرت کی طرف رغبت پر ابھارتی ہیں۔ اسی لیے فرمایا: ﴿وَمَا الْحَيَاةُ الدُّنْيَا إِلَّا مَتَاعُ الْغُرُورِ﴾ یعنی دنیا کی زندگی صرف ایک سامان ہے جس سے فائدہ اٹھایا جاتا ہے اور جس سے ضرورتیں پوری کی جاتی ہیں؛ اس سے دھوکا وہی کھاتے ہیں اور اسی پر وہی مطمئن ہوتے ہیں جن کی عقلیں کمزور ہیں، جنہیں فریب دینے والا (شیطان) اللہ کے بارے میں دھوکے میں ڈال دیتا ہے۔ پھر اللہ تعالیٰ نے اپنی مغفرت، رضا اور جنت کی طرف سبقت کرنے کا حکم دیا، اور یہ اسباب مغفرت اختیار کرنے سے ہوتا ہے، جیسے سچی توبہ، نفع دینے والی استغفار، گناہوں اور ان کے مقامات سے دوری، اور نیک عمل کے ذریعے اللہ کی رضا کی طرف سبقت، اور ہمیشہ ان کاموں کی حرص جو اللہ کو پسند ہوں، یعنی خالق کی عبادت میں احسان اور مخلوق کے ساتھ ہر طرح کے نفع کے ذریعے احسان۔ اسی لیے اللہ نے وہ اعمال ذکر فرمائے جو اس کے موجب ہیں، چنانچہ فرمایا: ﴿وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ﴾ اور اللہ اور اس کے رسولوں پر ایمان میں دین کے اصول اور اس کی فروعات دونوں شامل ہیں۔ ﴿ذَلِكَ فَضْلُ اللَّهِ يُؤْتِيهِ مَن يَشَاءُ﴾ یعنی یہ وہ بات ہے جو ہم نے تمہارے لیے بیان کی، اور جن راستوں سے جنت تک پہنچا جاتا ہے اور جن راستوں سے آگ تک، ان سب کا ذکر کیا؛ اور اللہ کا فضل بڑے ثواب اور عظیم اجر کی صورت میں، اپنے بندوں پر اس کا سب سے بڑا احسان اور فضل ہے۔ ﴿وَاللَّهُ ذُو الْفَضْلِ الْعَظِيمِ﴾ جس کی ثنا شمار میں نہیں آ سکتی، بلکہ وہ ویسا ہی ہے جیسا اس نے خود اپنی ثنا کی، اور اس سے بھی بڑھ کر ہے جو اس کے بندے اس کی ثنا کر سکیں۔