یعنی: اور جب ان منکروں کے سامنے ہماری آیتیں {بینات} کے ساتھ پڑھی جاتی ہیں، ایسی صورت میں کہ ان میں کوئی شک کی گنجائش نہ رہے اور ان کے واقع ہونے اور حق ہونے میں کوئی شبہ نہ ہو، تو ان کو کچھ فائدہ نہیں دیتیں، بلکہ اسی سے ان پر حجت قائم ہو جاتی ہے۔ اور وہ اپنے جھوٹ اور بہتان کے طور پر حق کے بارے میں، جب وہ ان کے پاس آیا، کہتے ہیں: {یہ تو کھلا جادو ہے}، یعنی ظاہر ہے جس میں کوئی شک نہیں۔ یہ حقائق کو الٹنے کی ایک صورت ہے، جو صرف کمزور عقل والوں پر چل سکتی ہے، ورنہ جو حق رسول اللہ ﷺ لے کر آئے، اور جادو، ان دونوں میں جو تضاد اور مخالفت ہے وہ آسمان اور زمین کے فاصلے سے بھی زیادہ ہے۔ اور حق، جو افلاک سے بھی بلند ہوا، اور جس کی روشنی نے سورج کی روشنی پر غلبہ پایا، اور جس پر آفاقی اور نفسی دلائل قائم ہیں، اور جسے صاحبانِ بصیرت اور سنجیدہ عقل والوں نے تسلیم کر کے اس کے آگے سر جھکایا، اس کا باطل کے ساتھ، یعنی ایسے جادو کے ساتھ موازنہ کیسے کیا جا سکتا ہے جو صرف گمراہ، ظالم اور خبیث النفس اور خبیث العمل شخص ہی سے صادر ہوتا ہے؟ پس وہ اسی کے مناسب اور اسی کے حال کے موافق ہے۔ اور کیا یہ محض ظاہری چمک دمک کے سوا کچھ ہے؟ {کیا وہ کہتے ہیں کہ اسے (محمد ﷺ) نے گھڑ لیا ہے}، یعنی محمد ﷺ نے یہ قرآن اپنی طرف سے گھڑ لیا ہے اور وہ اللہ کی طرف سے نہیں۔ {کہہ دیجیے}: {اگر میں نے اسے گھڑا ہے تو اللہ میرے بارے میں قادر ہے، اور جو تم اس میں لگے رہتے ہو اس کا وہ عالم ہے}، تو پھر اس نے میرے اس افترا پر، جیسا تم گمان کرتے ہو، مجھے سزا کیوں نہ دی؟ کیا {تم اللہ کے مقابلے میں میرے لیے کچھ اختیار رکھتے ہو} اگر اللہ مجھے کوئی تکلیف پہنچانا چاہے، یا مجھ پر رحم کرنا چاہے؟ {میرے اور تمھارے درمیان اللہ گواہی کے لیے کافی ہے}۔ پس اگر میں اس پر جھوٹ باندھنے والا ہوتا تو وہ مجھے دائیں ہاتھ سے پکڑ لیتا اور ایسی سزا دیتا جسے ہر شخص دیکھ لیتا، کیونکہ اگر میں جھوٹا ہوتا تو یہ افترا کی سب سے بڑی قسم ہوتی۔ پھر اس نے ان کو توبہ کی دعوت دی، باوجود اس کے کہ ان کی طرف سے حق کی مخالفت اور جھگڑا ہو چکا تھا، چنانچہ فرمایا: {اور وہی بخشنے والا، رحم کرنے والا ہے}، یعنی تم اس کی طرف توبہ کرو اور جس (گناہ) میں تم ہو اس سے باز آ جاؤ، وہ تمھارے گناہ بخش دے گا اور تم پر رحم فرمائے گا، تمھیں بھلائی کی توفیق دے گا اور بڑا اجر عطا کرے گا۔ {کہہ دیجیے: میں رسولوں میں کوئی انوکھا نہیں ہوں}، یعنی میں تمھارے پاس آنے والا پہلا رسول نہیں ہوں کہ تم میری رسالت کو عجیب سمجھو اور میری دعوت کا انکار کرو، کیونکہ مجھ سے پہلے رسولوں اور نبیوں میں سے وہ بھی گزرے ہیں جن کی دعوت میری دعوت کے موافق تھی، پھر میری رسالت کا انکار کیوں؟ {اور میں نہیں جانتا کہ میرے ساتھ اور تمھارے ساتھ کیا کیا جائے گا}، یعنی میں محض ایک بشر ہوں، میرے ہاتھ میں کوئی اختیار نہیں، اور میرے اور تمھارے معاملات کا تصرف اللہ تعالیٰ ہی کے پاس ہے، وہی میرے اور تمھارے اوپر حاکم ہے، اور میں اپنی طرف سے کوئی نئی بات لانے والا نہیں۔ {اور میں تو صرف کھلا ڈرانے والا ہوں}۔ پس اگر تم میری رسالت قبول کرو اور میری دعوت پر لبیک کہو تو یہ تمھارا حصہ اور تمھارا نصیب دنیا اور آخرت میں ہے، اور اگر تم اسے رد کر دو تو تمھارا حساب اللہ کے ذمے ہے، اور میں نے تمھیں ڈرا دیا، اور جسے ڈرایا جائے اس پر حجت تمام ہو گئی۔ {کہہ دیجیے: بتاؤ اگر یہ اللہ کی طرف سے ہو اور تم اس کا انکار کرو، اور بنی اسرائیل میں سے ایک گواہ اس جیسی (کتاب) پر گواہی دے، پھر وہ ایمان لے آئے اور تم تکبر کرو}، یعنی مجھے بتاؤ، اگر یہ قرآن اللہ کی طرف سے ہو، اور اہلِ کتاب میں سے توفیق یافتہ لوگ، جن کے پاس وہ حق ہے جس سے وہ پہچانتے ہیں کہ یہی حق ہے، اس کی صداقت کی گواہی دیں، پھر وہ ایمان لائیں اور ہدایت پائیں، تو انبیاء اور ان کے شریف پیروکاروں کی خبریں ایک دوسرے کے مطابق ہو جائیں گی، اور تم اے نادانو اور کم عقلو تکبر کرو، تو کیا یہ سب سے بڑا ظلم اور سب سے سخت کفر نہ ہوگا؟ {بے شک اللہ ظالم قوم کو ہدایت نہیں دیتا}، اور حق کو پا لینے کے بعد اس سے تکبر کرنا بھی ظلم ہی کی ایک قسم ہے۔