یعنی جب یہ لوگ قیامت کے دن حاضر کیے جائیں گے، اور اپنی تکذیب کی چیز کو آنکھوں سے دیکھ لیں گے، اور وہ چیز دیکھ لیں گے جس کا وہ مذاق اڑاتے تھے، تو ان کو اس آگ کی طرف لے جانے کا حکم دیا جائے گا جس کو وہ جھٹلایا کرتے تھے، پھر کہا جائے گا: {جمع کرو ان لوگوں کو جنہوں نے ظلم کیا} یعنی اپنے آپ پر کفر، شرک اور گناہوں کے ذریعے، {اور ان کے ساتھیوں کو} جو ان کے عمل کی جنس سے ہیں، ہر ایک کو اس کے ہم عمل کے ساتھ ملا دیا جائے گا۔ {اور جن کی وہ عبادت کرتے تھے} {اللہ کے سوا} یعنی بتوں اور ان شریکوں میں سے جنہیں وہ (معبود) گمان کرتے تھے، سب کو اکٹھا کرو، {پھر ان کو جہنم کے راستے کی طرف لے چلو} یعنی ان کو سختی کے ساتھ جہنم کی طرف ہانکو۔ اور جب ان کا انجام آگ ہی متعین ہو جائے گا اور وہ جان لیں گے کہ وہ ہلاکت کے گھر کے لوگ ہیں، تو کہا جائے گا: {ان کو ٹھہرا لو} اس سے پہلے کہ انہیں جہنم تک پہنچاؤ {بے شک ان سے پوچھ ہونی ہے} اس بارے میں جو وہ دنیا میں گھڑا کرتے تھے، تاکہ سب کے سامنے ان کا جھوٹ اور رسوائی ظاہر ہو جائے۔ پھر ان سے کہا جائے گا: {تمہیں کیا ہوا کہ ایک دوسرے کی مدد نہیں کرتے؟} یعنی آج تم پر کیا گزر رہی ہے؟ اور تمہیں کیا ہوا کہ تم میں سے کوئی دوسرے کی مدد نہیں کرتا اور نہ کسی کی فریاد رسی کرتا ہے، حالانکہ تم دنیا میں دعویٰ کرتے تھے کہ تمہارے معبود تم سے عذاب کو دور کریں گے، تمہاری فریاد رسی کریں گے اور اللہ کے ہاں تمہاری سفارش کریں گے؟ گویا وہ اس سوال کا جواب نہیں دے سکیں گے، کیونکہ ذلت و رسوائی ان پر چھا چکی ہوگی، وہ جہنم کے عذاب کے آگے سرِ تسلیم خم کر چکے ہوں گے، عاجز و خاکسار ہوں گے اور مایوس ہو کر خاموش رہیں گے۔ اسی لیے فرمایا: {بلکہ آج وہ سب سرِ تسلیم خم کیے ہوئے ہیں}۔