یہ وہ آیت ہے جسے آیتِ حجاب کہا جاتا ہے۔ اللہ تعالیٰ نے اپنے نبی ﷺ کو حکم دیا کہ عام عورتوں کو حکم دیں، اور آغاز اپنی ازواج اور بیٹیوں سے کریں، کیونکہ وہ دوسروں کی نسبت زیادہ مؤکد ہیں، اور اس لیے کہ حکم دینے والے کو دوسروں سے پہلے اپنے اہل خانہ سے آغاز کرنا چاہیے، جیسا کہ اللہ تعالیٰ نے فرمایا: ﴿يا أيها الذين آمنوا قوا أنفسكم وأهليكم نارا﴾ [التحریم: 6] [قرآن: "اے ایمان والو! اپنے آپ کو اور اپنے گھر والوں کو اس آگ سے بچاؤ"]۔ یعنی وہ اپنی چادروں (جلابیب) کو اپنے اوپر لٹکا لیا کریں، اور یہ وہ کپڑے ہیں جو لباس کے اوپر پہنے جاتے ہیں، جیسے چادر، اوڑھنی، دوپٹہ اور اسی طرح کی دوسری چیزیں، تاکہ ان سے اپنے چہرے اور سینے ڈھانپیں۔ پھر اس کی حکمت بیان فرمائی: ﴿ذلك أدنى أن يعرفن فلا يؤذين﴾ [یہ اس کے زیادہ قریب ہے کہ وہ پہچانی جائیں اور انھیں تکلیف نہ دی جائے]۔ اس سے معلوم ہوا کہ اگر وہ پردہ نہ کریں تو تکلیف کا خطرہ موجود ہے، کیونکہ جب وہ پردہ نہیں کرتیں تو ممکن ہے کہ انھیں غیر عفیفہ سمجھ لیا جائے، چنانچہ جس کے دل میں روگ ہو وہ ان کے درپے ہو جائے اور انھیں ایذا دے، اور بعض اوقات انھیں حقیر جانا جائے اور یہ گمان کیا جائے کہ وہ کنیزیں ہیں، تو شر کا ارادہ رکھنے والا ان سے بے پروائی برتے۔ پس پردہ لالچیوں کے طمع کے دروازے کو بند کر دیتا ہے۔ ﴿وكان الله غفورا رحيما﴾ [اور اللہ بخشنے والا اور رحم فرمانے والا ہے]، کیونکہ اس نے جو پہلے ہو چکا اسے معاف فرمایا اور تم پر رحم کیا کہ احکام واضح کر دیے اور حلال و حرام کو کھول کر بیان کر دیا۔ یہ عورتوں کی جانب سے دروازہ بند کرنا ہے۔ رہے اہلِ شر تو اللہ نے ان کو اس فرمان کے ذریعے وعید سنائی: ﴿لئن لم ينته المنافقون والذين في قلوبهم مرض﴾ [اگر منافق اور وہ لوگ جن کے دلوں میں روگ ہے باز نہ آئے] یعنی شک یا شہوت کا روگ ﴿والمرجفون في المدينة﴾ [اور مدینہ میں جھوٹی افواہیں پھیلانے والے] یعنی وہ لوگ جو خوف پھیلاتے اور دشمنوں کا رعب بٹھاتے، اور اپنی کثرت و قوت اور مسلمانوں کی کمزوری کی خبریں گھڑتے ہیں۔ اس نے وہ کام ذکر نہیں کیا جس سے انھیں باز رہنا ہے، تاکہ یہ حکم ہر اس شر کو شامل ہو جو ان کے نفس انھیں سجھاتے، ان کے دل میں وسوسہ ڈالتے اور اس کی طرف بلاتے ہیں، جیسے اسلام اور اہلِ اسلام پر طعن کے پہلو سے بات کرنا، مسلمانوں میں خوف پھیلانا، ان کی طاقت کو کمزور کرنا، مومنات کو بری بات اور بدکاری کی نیت سے چھیڑنا، اور اس قبیل کے لوگوں کے دیگر گناہ۔ ﴿لنغرينك بهم﴾ یعنی ہم تمھیں ان کی سزا اور ان سے جنگ کا حکم دیں گے اور انھیں تم پر مسلط کریں گے۔ پھر جب ہم ایسا کریں گے تو ان میں تمھارا مقابلہ کرنے کی طاقت نہ ہوگی، اور ان میں نہ کوئی قوت ہوگی نہ مزاحمت کی سکت، اسی لیے فرمایا: ﴿ثم لا يجاورونك فيها إلا قليلا﴾ یعنی وہ مدینہ میں تمھارے پڑوس میں نہیں رہیں گے مگر بہت کم، یا تو تم انھیں قتل کر دو گے یا جلاوطن کر دو گے۔ اس میں اہلِ شر کو نکالنے کی دلیل ہے، جن کا مسلمانوں کے درمیان رہنا نقصان دہ ہو، کیونکہ یہ شر کی جڑ کاٹنے اور اسے دور رکھنے کا بہتر طریقہ ہے۔ ﴿ملعونين أينما ثقفوا أخذوا وقتلوا تقتيلا﴾ [پھٹکارے ہوئے، جہاں کہیں بھی پائے جائیں پکڑے جائیں اور بری طرح قتل کیے جائیں] یعنی جہاں بھی ملیں دھتکارے ہوئے ہوں، انھیں کوئی امن نہ ملے، اور نہ انھیں کوئی ٹھکانہ نصیب ہو، وہ ڈرتے رہیں کہ کہیں انھیں قتل نہ کیا جائے، یا قید نہ کر دیا جائے، یا سزا نہ دی جائے۔ ﴿سنة الله في الذين خلوا من قبل﴾ [یہ اللہ کا دستور ہے ان لوگوں کے بارے میں جو پہلے گزر چکے] کہ جو شخص نافرمانی میں حد سے بڑھ جائے اور ایذا رسانی کی جرأت کرے، اور اس سے باز نہ آئے، تو اسے سخت سزا دی جاتی ہے۔ ﴿ولن تجد لسنة الله تبديلا﴾ [اور تم اللہ کے دستور میں کوئی تبدیلی نہ پاؤ گے] یعنی کوئی تغیر نہیں، بلکه اللہ تعالیٰ کا دستور اور اس کی عادت انھی اسباب کے ساتھ جاری رہتی ہے جو اپنے نتائج کا تقاضا کرتے ہیں۔