اللہ تعالیٰ فرماتا ہے: {بے شک جس نے آپ پر قرآن فرض کیا} یعنی اسے نازل کیا، اس میں احکام مقرر کیے، حلال و حرام واضح کیے، اور آپ کو حکم دیا کہ اسے تمام جہانوں تک پہنچائیں اور تمام مکلفین کو احکام کی دعوت دیں۔ اس کی حکمت کے لائق نہیں کہ زندگی صرف دنیا کی زندگی ہو، بغیر اس کے کہ بندوں کو ثواب دیا جائے یا سزا دی جائے، بلکہ ضروری ہے کہ وہ آپ کو ایک لوٹنے کی جگہ (معاد) کی طرف واپس لائے، جہاں نیک لوگوں کو ان کی نیکی کا بدلہ دیا جائے گا اور برے لوگوں کو ان کی نافرمانی کا۔ اور آپ نے ان کے لیے ہدایت واضح کر دی اور راستہ کھول دیا، پس اگر وہ آپ کی پیروی کریں تو یہ ان کا نصیب اور ان کی سعادت ہے، اور اگر وہ آپ کی نافرمانی اور اس ہدایت کی مخالفت پر اڑے رہیں اور جو باطل ان کے پاس ہے اسے حق پر ترجیح دیں، تو بحث کی کوئی گنجائش باقی نہیں رہتی، اور اب صرف اعمال کا بدلہ باقی رہ جاتا ہے، جو غیب و شہادت کو جاننے والا اور حق و باطل کو پہچاننے والا (اللہ) دے گا۔ اسی لیے فرمایا: {کہہ دیجیے کہ میرا رب خوب جانتا ہے کہ ہدایت لے کر کون آیا اور کون کھلی گمراہی میں ہے} اور اللہ جانتا ہے کہ اس کا رسول ہدایت یافتہ اور ہدایت دینے والا ہے، اور اس کے دشمن گمراہ اور گمراہ کرنے والے ہیں۔ {اور آپ کو یہ امید نہ تھی کہ آپ کی طرف کتاب اتاری جائے گی} یعنی آپ اس کتاب کے نازل ہونے کے منتظر نہ تھے، نہ اس کے لیے تیار تھے، نہ اس کے طالب تھے۔ {مگر آپ کے رب کی رحمت سے} آپ پر اور بندوں پر، تو اس نے آپ کو اس کتاب کے ساتھ بھیجا جس سے اس نے جہانوں پر رحم فرمایا، اور انھیں وہ سکھایا جو وہ نہیں جانتے تھے، اور انھیں پاک کیا اور کتاب و حکمت کی تعلیم دی، حالانکہ وہ اس سے پہلے کھلی گمراہی میں تھے۔ پس جب آپ جان گئے کہ یہ کتاب اس کی طرف سے آپ پر رحمت کے طور پر نازل ہوئی ہے، تو [آپ جان گئے] کہ اس کا جو کچھ حکم دیا گیا اور جس سے منع کیا گیا، وہ سب رحمت اور اللہ کا فضل ہے، پس آپ کے سینے میں اس کے کسی حکم سے تنگی نہ ہو، اور یہ گمان نہ کریں کہ اس کی مخالفت میں بہتری یا فائدہ ہے۔ {پس آپ کافروں کے مددگار نہ بنیں} یعنی ان کے کفر کے کسی شعبے پر ان کی مدد نہ کریں، اور ان کی حمایت میں سے یہ بھی ہے کہ اس کے کسی حکم کے بارے میں کہا جائے کہ وہ حکمت، مصلحت اور فائدے کے خلاف ہے۔ {اور وہ آپ کو اللہ کی آیات سے، آپ پر ان کے نازل ہونے کے بعد، ہرگز نہ روکیں} بلکہ انھیں پہنچائیں اور نافذ کریں، ان کے مکر کی پروا نہ کریں، وہ آپ کو ان سے دھوکے میں نہ ڈالیں، اور ان کی خواہشات کی پیروی نہ کریں۔ {اور اپنے رب کی طرف دعوت دیں} یعنی اپنے رب کی طرف دعوت کو اپنے قصد کی انتہا اور عمل کا مقصد بنائیں، پس جو کچھ اس کے خلاف ہو، ریا، دکھاوے، یا اہل باطل کی غرض کی موافقت سے، اسے چھوڑ دیں، کیونکہ یہ ان کے ساتھ رہنے اور ان کے کام میں مدد کرنے کی طرف بلاتا ہے۔ اسی لیے فرمایا: {اور مشرکین میں سے نہ ہوں} نہ ان کے شرک میں، نہ اس کی فرعوں اور شاخوں میں جو تمام گناہ ہیں۔ {اور اللہ کے ساتھ کسی دوسرے معبود کو نہ پکاریں} بلکہ اپنی عبادت کو خالص اللہ کے لیے کریں، کیونکہ {اس کے سوا کوئی معبود نہیں} پس کوئی بھی اس کا حق دار نہیں کہ اسے معبود بنایا جائے، محبت کی جائے اور اس کی عبادت کی جائے، سوائے اس کامل اور باقی رہنے والے اللہ کے، جس کے سوا {ہر چیز فنا ہونے والی ہے مگر اس کی ذات} ۔ اور جب اس کے سوا ہر چیز فنا ہونے والی اور مٹنے والی ہے تو فانی اور باطل کی عبادت اپنی غایت کے باطل ہونے اور انجام کے بگڑنے کی وجہ سے باطل ہے۔ {حکم اسی کا ہے} دنیا و آخرت میں {اور تم اسی کی طرف لوٹائے جاؤ گے} کسی اور کی طرف نہیں۔ پس جب اللہ کے سوا ہر چیز باطل اور فنا ہونے والی ہے، اور اللہ ہی باقی رہنے والا ہے جس کے سوا کوئی معبود نہیں، اور دنیا و آخرت میں حکم اسی کا ہے، اور تمام مخلوق اسی کی طرف لوٹنے والی ہے تاکہ وہ انھیں ان کے اعمال کا بدلہ دے، تو جو عقل رکھتا ہو اس پر لازم ہے کہ وہ اکیلے اللہ کی عبادت کرے جس کا کوئی شریک نہیں، اور ایسے کام کرے جو اسے اس کے قریب کریں، اور اس کی ناراضی اور عذاب سے ڈرے، اور یہ کہ وہ اپنے رب کے پاس توبہ کیے بغیر اور اپنی غلطیوں اور گناہوں سے باز آئے بغیر نہ جائے۔