اللہ تعالیٰ خبر دیتا ہے کہ اس شخص سے بڑا کوئی ظالم اور اس سے بڑا کوئی مجرم نہیں جسے اللہ کی آیات کے ذریعے نصیحت کی گئی، جس کے لیے حق اور باطل میں اور ہدایت اور گمراہی میں فرق واضح کیا گیا، جسے ڈرایا گیا، خوف دلایا گیا اور امید دلائی گئی، مگر وہ ان سے منہ موڑ گیا، پس نصیحت کے باوجود نصیحت نہ پکڑی، اپنی اسی حالت پر قائم رہا، اور اپنے ہاتھوں کے آگے بھیجے ہوئے گناہ بھول گیا، اور علام الغیوب (غیب کے جاننے والے) سے نہ ڈرا۔ پس یہ شخص اس معترض سے بھی بڑا ظالم ہے جس تک اللہ کی آیات نہ پہنچیں اور جسے نصیحت نہ کی گئی ہو، اگرچہ وہ بھی ظالم ہے، مگر اس کا ظلم اس سے ہلکا ہے، کیونکہ جو گناہ گار بصیرت اور علم کے ساتھ گناہ کرے وہ اس شخص سے بڑھ کر ہے جو ایسا نہ ہو۔ لیکن اللہ تعالیٰ نے اس کو اس کے آیات سے منہ موڑنے، اپنے گناہوں کو بھلانے، اور علم ہوتے ہوئے اپنے نفس کو برائی پر راضی رکھنے کی وجہ سے سزا دی کہ اس کے لیے ہدایت کے دروازے بند کر دیے، یعنی اس کے دل پر پردے ڈال دیے جو مضبوطی سے اسے روکتے ہیں کہ وہ آیات کو سمجھے، اگرچہ وہ انھیں سنتا ہو۔ اس لیے ان آیات کا وہ فہم اس کے دل تک نہیں پہنچ سکتا، {اور ان کے کانوں میں بوجھ ہے} یعنی بہرا پن ہے جو انھیں آیات کے پہنچنے سے اور ان کے سننے سے فائدہ اٹھانے سے روکتا ہے۔ جب ان کی یہ حالت ہو تو ان کی ہدایت کی کوئی راہ نہیں، {اور اگر تم انھیں ہدایت کی طرف بلاؤ تو وہ کبھی ہدایت نہ پائیں گے}، کیونکہ جس سے امید ہو کہ وہ داعی کی بات مان لے گا وہ وہ ہے جو عالم نہ ہو۔ رہے یہ لوگ جنھوں نے دیکھا پھر اندھے ہو گئے، جنھوں نے حق کے راستے کو حق جانا پھر اسے چھوڑ دیا، اور گمراہی کے راستے کو گمراہی جانا پھر اسے اختیار کیا، اور اللہ نے ان کے دلوں پر مہر لگا کر ان کو سزا دی، تو ان کی ہدایت کی کوئی تدبیر اور کوئی راستہ نہیں۔ اس آیت میں اس شخص کے لیے ڈراوا ہے جو علم کے بعد حق کو چھوڑ دے کہ اس کے اور حق کے درمیان رکاوٹ ڈال دی جائے اور پھر وہ اس تک پہنچ نہ سکے، اور اس سے بڑھ کر کوئی ڈرانے اور روکنے والی بات نہیں۔ پھر اللہ تعالیٰ اپنی وسیع بخشش اور رحمت کی خبر دیتا ہے کہ وہ گناہ بخشتا ہے، اور جو توبہ کرے اس کی توبہ قبول کرتا ہے، اسے اپنی رحمت میں ڈھانپ لیتا ہے اور اپنے احسان سے نوازتا ہے۔ اور اگر وہ بندوں کو ان کے ہاتھوں کے آگے بھیجے ہوئے گناہوں پر پکڑتا تو ان پر فوراً عذاب بھیج دیتا، لیکن وہ بردبار ہے، سزا میں جلدی نہیں کرتا، بلکہ مہلت دیتا ہے اور چھوڑتا نہیں، اور گناہوں کے اثرات کا ظہور ضرور ہوتا ہے، اگرچہ اس میں دیر ہو جائے۔ اسی لیے فرمایا: {بلکہ ان کے لیے ایک وعدے کا وقت ہے، اس کے سوا وہ کوئی پناہ گاہ نہ پائیں گے}، یعنی ان کے لیے ایک وقت مقرر ہے جس میں ان کے اعمال کا بدلہ دیا جائے گا، اس سے ان کا کوئی مفر نہیں، نہ اس سے بچنے کی کوئی جگہ ہے اور نہ کوئی پناہ۔ اور یہی اس کی سنت پہلے اور بعد کے لوگوں کے بارے میں ہے کہ وہ انھیں فوراً عذاب نہیں دیتا، بلکہ انھیں توبہ اور رجوع کی طرف بلاتا ہے۔ پس اگر وہ توبہ کر لیں اور رجوع کریں تو اللہ انھیں بخش دیتا ہے اور ان پر رحم فرماتا ہے اور ان سے عذاب ہٹا دیتا ہے۔ ورنہ اگر وہ اپنے ظلم اور ہٹ دھرمی پر قائم رہیں اور وہ وقت آ جائے جو اس نے ان کے لیے مقرر کیا ہے تو ان پر اپنا عذاب نازل کر دیتا ہے۔ اسی لیے فرمایا: {اور یہ بستیاں ہیں جنھیں ہم نے ان کے ظلم کے سبب ہلاک کیا} یعنی ان کے اپنے ظلم کی وجہ سے، کسی ہماری طرف سے ظلم کی وجہ سے نہیں، {اور ہم نے ان کی ہلاکت کا ایک وقت مقرر کیا تھا} یعنی ایسا وقت جس سے وہ نہ آگے بڑھ سکتے تھے اور نہ پیچھے رہ سکتے تھے۔